29.4.07

SOS-COUREL. Unha axuda para salvar un dos espacios máis valiosos da nosa terra.


Non hai máis que asomarse as imaxes aéreas de Google para apercibirse das profundas feridas que as explotacións mineiras deixan na natureza. Máis aprésa do que ésta soporta e aínda moito máis do que os romanos puideron facer en todos os séculos da súa dominación. Os bosques, a cuberta vexetal e ata os cumios desaparecen tralo paso das máquinas.
A Asociación SOS-Courel fai unha solicitude de axuda e apoio para as súas demandas ante a administración autonómica, a favor da conservación do Courel.
A urxencia ven dada ante a inminente legalización da canteira de “A Campa”, a documentación da cal obra en poder da Comisión Superior de Urbanismo. Dita canteira está situada en pleno espacio natural, moi preto do Río Lor e de poboacións como Folgoso de Courel, Valdomir, Vilamor, Frouxán e Santa Eufemia.



Unha mirada ao mapa do Courel, permítenos comprobar que existen tantas minas abertas como castros, senón máis. Explotacións que se van comendo o noso patrimonio natural.
SOS-Courel pídelle á Xunta de Galicia, entre outros puntos: Que declaren o Courel Parque Natural, incluíndo as cuncas dos ríos Lor, louzara, Selmo e Ferreiriño, librando este territorio de impactos e concesións incompatibles. A devolución á Rede Natura da cunca do Lor, incomprensiblemente descualificado no ano 2004, un corredor que une os Ancares e o Canón do Sil e por suposto a denegación da licencia a canteira de “A Campa” que está a traballar sen licencia municipal, nin autorización da Xunta e cunha orde de peche.
Nós apoiamos totalmente calquera iniciativa que trate de protexer un dos maiores tesouros de Galicia, a terra do Courel. Rexeitamos a existencia de explotacións mineiras a ceo descuberto en calquera zona de valor natural e deploramos que no caso que nos ocupa, xunto con Os Ancares, as proteccións sexan tan escasas por unha banda e que non se fagan cumprir por outra.
Para todos os que desexades poñervos en contacto con “SOS-Courel”, ben para aportar a vosa axuda ou para coñecer máis datos, podedes dirixirvos a:
soscourel@mundo-r.com
--

Etiquetas: ,

0 comentarios:

Publicar un comentario

Suscribirse a Enviar comentarios [Atom]

<< Página principal